Adeladius Makwega| Dodoma, Oktoba 7, 2026
Katika kuadhimisha Juma la Huduma kwa Wateja, Ofisi ya Rais, Idara ya Kumbukumbu na Nyaraka za Taifa, ilipata fursa ya kumpokea Mhadhiri Msaidizi kutoka Chuo Kikuu cha Dar es Salaam, Mtechura Brighton, ambaye pia ni mtafiti wa masuala ya utamaduni na filamu nchini Tanzania.
Akiwa katika ofisi za Idara jijini Dodoma, Mtechura alihudumiwa na Bi. Leaclara Ngair, Afisa Kumbukumbu, katika ziara iliyobeba ujumbe mpana zaidi ya huduma kwa mteja.
Mazungumzo yaligusa kwa kina maendeleo ya sekta ya filamu, mabadiliko ya teknolojia na umuhimu wa kulinda maadili, mila na tamaduni za Tanzania.
Mtechura alieleza kuwa maendeleo ya teknolojia yameleta fursa kubwa katika sekta ya filamu, lakini pia yameibua changamoto zinazohitaji umakini.
“Sekta ya filamu imepiga hatua, lakini mabadiliko ya teknolojia na soko huria yameleta mambo mazuri na mabaya. Sekta hii inahitaji umakini zaidi.”
Ziara hii imebeba pia ujumbe wa Juma la Huduma kwa Wateja: kwamba mteja anapofika katika taasisi, anapaswa kupata huduma yenye heshima, ufanisi, taarifa sahihi na mazingira rafiki.
Kwa watafiti wanaotafuta historia ya taifa, huduma bora ya kumbukumbu ni sehemu muhimu ya safari ya kupata maarifa.
Katika dunia inayobadilika kwa kasi kutokana na teknolojia, kulinda kumbukumbu za taifa ni kulinda historia, utamaduni na utambulisho wa taifa.
Kwa mtafiti, kumbukumbu si mafaili yaliyohifadhiwa tu; ni hazina ya taarifa, historia na maarifa.
Akizungumzia utafiti wake, Mtechura alieleza kufurahishwa na taarifa anazozipata katika mchakato wake na akatoa pongezi kwa Idara kwa kutunza kumbukumbu za taifa.
“Kumbukumbu hizi ni utajiri wa miaka mingi ambao una umuhimu mkubwa kwa watafiti na taifa kwa ujumla.”
Na hapa ndipo huduma, kumbukumbu na utafiti vinapokutana.
Juma la Huduma kwa Wateja 2026 — Tunawahudumia, tunathamini mchango wao na tunalinda kumbukumbu kwa ajili ya vizazi vijavyo.
makwadeladius@gmail.com
0717649257
